قدم النجم تامر حسني نصائح للتخلص من “العادات السيئة” و”مجاهدة النفس”، مؤكداً أنه اقتبسها من تجربته الشخصية ومن اطلاعه الواسع على الكتب المتخصصة في هذا المجال.
وكتب: “يوم جميل على الجميع كالعادة مش بعتبركم محبين فقط لا انا دايماً بشوفكم ناس من أهلي حتى لو بعضكم معندوش الاحساس دا تجاهي، انا بقى عندي تجاهكم كلكم الاحساس دا و دا احساس ربنا زرعه فيا معرفش ليه و معرفش ليه مزروع فيا بالقوة دي عشان كدا اقسم بالله اي خير بعرفه بحب انقله ليكم فوراً”.
وأضاف: كنت بقرأ موضوع مهم اوي بما اني مجنون قراءه و سماع حبيت اكلمكم عنه و هو ((مجاهدة النفس )) واثق اننا كلنا بنمر بظروف و مؤثرات و افكار بتغير حاجات جوانا في ناس بتغيرها للأفضل و في ناس للأسوأ و كلامي لكل شخص حاسس من جواه انه متضايق و عنده خطأ في فكره او عقيدته و قناعته او عاده سيئة و معصيه ثابته مش عارف يتخلص منها او صفه في شخصيته مش كويسه و فاقد الامل في تصليحها”.
وتابع ناصحاً محبيه: “عشان يصلحها و يتغير لازم اول حاجه يعترف بيها قدام نفسه و ميقاوحش و يبرر وجودها، لازم يشوفها يبقى أولا تعترف بيها قدام نفسك، وثانيا تاخد قرار حاسم في بدء الإمتناع عنها، وثالثا تدرس المقابل لها في الصالح و تسعى في اتجاهه”.
وتوقف تامر حسني أمام تأثير الأصحاب وقدم الخطوة الرابعة بقوله: “اختار اصحاب صفاتهم بعيده عن هذه العيوب و العادات المشابهة.
واختتم: “اصبر على نفسك في التغيير يعني لو اخدت قرار ورجعت فيه مش معناه انك فشلت لا خد القرار تاني حتى لو فشلت في الاصلاح ١٠٠ مره عادي، خد كمل في اصرارك على التغيير و التطوير و خد كمان مره القرار اهم حاجه راقب نفسك وشوف مؤشر تحسنك بيزيد ولا ثابت خليك وراه لحد ما يبدأ يعلى هتلاقي نفسك واحده واحده انتصرت على نفسك و كسبت التحدي”.
تابعنا
