كتب أحمد قصار انتقاد قاسي للفنان تيم حسن، وذلك عبر أحد حساباته على مواقع التواصل الاجتماعي قائلاً: ما بتذكر إني كتبتلك بالنص كلمة اسبت، وماتهكلو للهم ومنتهية، وفرج … الخ من مفردات نمطك القديم… بالمناسبة كلمة فرج تعتبر كلمة نابية عنا بالشام، وكل ما واحد بقول فرج بيجي وراها الرد فورا بجملة يلي عطاك يا تحت الدرج، فما حلوة كل ما عم تقول فرج الناس عم تجاوبك فوراً.
وتابع: المهم حاولت… لما بلشت كتابة، كسر نمطية الشخصيات بعدما كانت منمطة كتير ومستنفذة بالأجزاء الماضية، وكان عندي الرغبة بتحويل هي الأنماط لشخصيات ومنهن شخصيتك، ليكون عندهن صراع داخلي وبعد نفسي يلي بخلينا ما نتوقع ردات فعلن ويعطيهن تجديد على صعيد كل شيء وكي تصبح عملية التحويل هي من نمط لشخصية كان لازم اجراء تغييرات كبيرة بأحداث العمل وتعريض الأنماط لتحولات جذرية عميقة تنقل النمط لمكان تاني وكان القرار بشخصيتك تعريض نمط جبل لفقدان العائلة بشكل مأساوي قادر على تغيير سلوك النمط، وخلق شرخ كبير طلع معدن الشخصية الأساسي وحولوا لشخصية وكمان تجربة العيش في العزلة بين الجرود وهي مرحلة تطهير كبيرة تعرضتلها الشخصية وقدرت تغيرها وتيجي بشكل جديد ومعطيات جديدة ولغة جديدة وصار هاد الشي.
وقال قصار: أنت كممثل كنت موفق بكل التفاصيل على صعيد الشكل وتغير الأداء الأنفعالي، اما انك بعد هذا الجهد بتحويل الأنماط لشخصيات تروح تستعار مفردات النمط القديم وتستعملها على الشخصية الجديدة بتكون عم تعمل خلل كبير يا حبيب، بضرك ألك اول شي، مشان ما يصير فيك متل غوار وحسني وياسينو لما النمط يبلع الممثل ويصير أكبر منو وتصير محاولات الخروج من هي النمطية عبثية وغير مجدية.
وأكمل : التحول يلي عملتو بالشخصية على صعيد الأداء منيح كتير بلكن رجعت تنمط حالك بمطارح ما كان لازم تعمل هيك مهما ضغطوا صناع النمط الفنيين يلي بعتقد حسب معرفتي فيهن ما بيعرفو يميزوا بين النمط وبين الشخصية. والحل انك تطلع من هذا النمط لتروح لشي جديد بحياتك هي انك تعمل شخصيات.
وأضاف : أما بالنسبة لبداية المسلسل بالشارة كاتبين تيم حسن في الهيبة، استاذ تيم حبيبنا بدنا نبطلها ونوزن شوي ما حلوة في عالم كتير عم تشتغل وبتاخد العقل ومو شغلتها تدور بفلكك، وكما قال محمود درويش نرسيس ليس جميلاً.. كما ظنّ . لكن صُنَّاعَهُ ورَّطوهُ بمرآته يلا سلام تاني مرة وقت بدك ترتجل مالح قلك خود أذن لح قلك أستشير قبل ما تعمل هيك شغلات، وكان لازم مدرب الممثلين ينتبه على هذا الشيء كونه شخص أكاديمي لكن لا اعلم هل يستطيع أن يوجه لك ملاحظة.
وختم قائلاً: على فكرة انا أحبيت المسلسل وأحبيت شو عامل بس هيك حبينا نناغشك. وصراعك ضد هدف نبيل وهو محاربة صناعة المخدرات من أسس تحويل شخصيتك ولو صحلي أقتلك بالمسلسل انت وعم تحارب لتحقق الهدف كنت عملتك أحلى بطل تراجيدي لكن لا استطيع هذا باب رزق . بكل حب حبيب .. لاعاد تنمط حالك .يلا سلام نسيت اعطيك مثال توضيحي. شخصية عبود ما كانت نمط رغم انو هيك بتبين . فهمت علي ولا عيد يا سعيد .. انتهت الرسالة.
يذكر أن مسلسل الهيبة يعرض حالياً بعنوان الرد، حيث أن العمل من بطولة الفنانة منى واصف والفنان تيم حسن والفنانة ديمة قندلفت والفنان عادل كرم، وغيرهم الكثير من نجوم الفن.
تابعنا
