شنت الفنانة نشوى مصطفى، هجوماً على أحد متابعيها الذي تواصل معها عبر الهاتف، والرسائل الخاصة على فيسبوك، وقالت إنه تواصل معها في وقت متأخر بعد منتصف الليل على أنه معد برامج.
وكتبت نشوى مصطفى، عبر فيسبوك: «بني ادم في منتهى قلة الأدب اللي يتصل دلوقتي علشان يقول لي أنه إعداد برنامج وعايزني معاهم — المهم ماردتش على رقمي الأولاني فاتكلم على الرقم التاني فقلت أرد لاحسن يكون حد من أهلي وفيه مصيبة، طلع حد سمج ومعندوش أدب وبيقولي ماكل الفنانين بيقولو لي اتصل أي وقت.. بجد مش مصدقة».
فيما كتب المتابع، منشوراً آخر للرد على نشوى مصطفى، قائلًا: «غريب أوي أن الفنانين طالعين في تقليعة جديدة وهي محاربة التنمر طب أصدقكم إزاى وأنتم في مسرحياتكم وأفلامكم بتنشروا التنمر زي أن أي ممثل كوميدي يطلع ممثل طخين ومليان علشان يضحك الناس على حجمه أو فنان أسود زي مسرحية هنيدي وأخوه بكر نص ساعة كاملة تنمر على لون بشرته أو اللي عنده صعوبة في النطق أو مخرج الكلام مختلف فيطلع يتنمر بطريقة كوميدية عفنة تعيب على خلق ربنا وغيره وغيره وغيره، وفي الآخر اسمع انهم بيحاربوا التنمر شيء مضحك مبكي».
فردت مصطفى، بمنشور آخر لها: «امبارح الساعة واحدة ونص الصبح كلمني شخص علشان يقول لي أنه عايزني ضيفة في برنامج — الحقيقة كلمني على رقمين تليفون ماردتش على الأول ولما كلمني على الرقم التاني قلت أكيد فيه مصيبة وحد بيستنجد بيا من أهلي مثلًا، المهم كتبت بوست هنا شرحت اللي حصل بدون ما اذكر اسمه ولا رقمه ولا البرنامج ولا القناة، النهارده دخل وأعلن عن نفسه وأنه كان بيتصل بيا لأني ممثلة أي كلام وما حدش بيتفرج عليا غير ولادي وأنه هو خريج جامعة أمريكية، وأني مجرد خريجة المعهد العالي للفنون المسرحية التابع لوزارة الثقافة المصرية، وده كلامه من فضلكم محتاجة مشورة اتصرف ازاي علشان افهمه آداب التعامل مع فنانة مصرية عضو نقابة المهن التمثيلية وخريجة المعهد العالي للفنون المسرحية التابع لوزارة الثقافة المصرية اللي بيعايرني بيه .. ملحوظة :- مثبت على تليفوناتي الوقت اللي اتصل فيه على التليفونين».